Kreu i Partisë Demokratike, Sali Berisha, u ka dhënë urdhër deputetëve dhe strukturave drejtuese të PD, që mos të marrin pjesë në emisione apo debate televizive pa lejen e partisë.
Në mesazhin drejtuar anëtarëve të Kryesisë, Grupit Parlamentar, Këshillit Kombëtar, departamenteve qendrore dhe degëve të PD, Berisha thekson se përfaqësuesit e opozitës duhet të dalin në debate televizive vetëm përballë përfaqësuesve politikë të qeverisë, Partisë Socialiste dhe institucioneve të saj.
Sipas tij, deputetët dhe funksionarët e PD nuk duhet të përballen në studio me analistë që ai i cilëson si “të pavarur”, duke i akuzuar se veprojnë si zëvendësues të qeverisë në media dhe se shërbejnë për të zhvendosur debatin nga përgjegjësit politikë te opozita.
Berisha pretendon se një pjesë e këtyre analistëve mbajnë role këshilltarësh apo drejtuesish në institucione shtetërore dhe se, sipas tij, përdoren për të mbuluar aferat dhe skandalet e qeverisë. Në këtë kuadër, ai thekson se opozita nuk duhet të lejojë, sipas tij, përdorimin e saj “si maskë mediatike” për të fshehur korrupsionin dhe abuzimet e mazhorancës.
Ndërkohë, në mesazh nënvizohet se intervistat dhe prononcimet që lidhen me aferat qeveritare, korrupsionin dhe skandalet duhet të shfrytëzohen maksimalisht nga përfaqësuesit e PD.
Gjithashtu, Berisha udhëzon që për çdo ftesë nga studiot televizive, deputetët dhe drejtuesit e PD të njoftojnë më parë Drejtorinë e Shtypit, me qëllim marrjen e mesazhit zyrtar të ditës dhe shmangien, sipas tij, të mediave të kontrolluara nga qeveria.
Në përfundim, Berisha bën me dije se ky vendim do t’u përcillet edhe partive aleate, me synimin që qëndrimi i opozitës të jetë i unifikuar.
