Gjatë një takimi në Njësinë 5 në Tiranë, Sali Berisha sulmoi ashpër mediat, duke pretenduar se “90 përqind e mediave kontrollohen nga qeveria” dhe se pronarët e tyre janë kthyer në “investitorë strategjikë” që përfitojnë favore dhe para publike.
Megjithatë, edhe pse foli për “mediat e kapura” në përgjithësi, Berisha përmendi me emër vetëm Carlo Bolinon dhe Irfan Hysenbelliun. Kjo është hera e dytë brenda një dite që kryetari i PD sulmon TV dhe dy nga pronarët e tyre.
Për Bolinon, kreu i PD-së tha se kishte përfituar 4500 metra katrorë tokë me 1 euro, duke e quajtur “hajdut me çizme”, ndërsa pretendoi se pronarët e mediave kanë marrë përfitime nga tenderat dhe projektet publike.
Berisha sulmoi edhe analistët në televizione, duke përmendur Idajet Beqirin, ndërsa akuzoi qeverinë se po përdor mediat për të krijuar “indiferencë” te qytetarët.
Në fund të deklaratës, ai tha se mbështet “lirinë e medias” dhe “pavarësinë e gazetarëve”, por paralajmëroi se do të vazhdojë përplasjen me atë që e quan “media e kapur” deri “në minutën e fundit të jetës” së tij.
