Tre ditë pasi refuzoi të paraqitej në SPAK për krimin shtetëror të 21 janarit, Sali Berisha sot duhet të shkelë në ambientet e Prokurorisë së Posaçme, në zbatim të masës së sigurisë “detyrim paraqitje” për aferën “Partizani”, ku është marrë i pandehur bashkë me dhëndrin e tij, Jamarbër Malltezi, dhe tre persona të tjerë.
Por a do të shfrytëzohet sot kjo mundësi nga prokurorët e çështjes së 21 janarit, të cilët po hetojnë vrasjen e katër protestuesve para Kryeministrisë, për t’i dorëzuar Berishës fletëthirrjen zyrtare për t’u paraqitur në procedim?
Kjo mbetet për t’u parë, ndërsa zhvillimet e ditëve të fundit kanë krijuar një panoramë të ndezur politike përpara një të hëne që pritet e vrullshme. Berisha ka deklaruar se “nuk ka marrë asnjë fletëthirrje” nga SPAK për çështjen e 21 janarit. Flamur Noka thotë se në selinë e PD-së nuk ka mbërritur asnjë njoftim. Gazment Bardhi akuzon SPAK-un se ka gënjyer, kur ka thënë se thirrja është dorëzuar në zyrat e grupit parlamentar të PD-së.
Ndërkohë, fletëthirrja ka qarkulluar lirshëm në media, por as kryetari i PD-së, as drejtuesit e tij nuk e kanë marrë në dorë fizikisht. Sot, me shumë gjasë, ata – dhe vetë Sali Berisha – do të mund ta kenë në duar për herë të parë.
Dhe atëherë nuk do t’i shpëtojnë dot pyetjes që po troket fort:
A do të paraqitet Sali Berisha për t’u marrë në pyetje nga prokurorët për rolin e tij si kryeministër në ngjarjen e rëndë të 21 janarit?
