Kreu i PD, Sali Berisha, ka deklaruar se publikut shqiptar po i fshihen zhvillime të rëndësishme lidhur me procesin e integrimit europian të vendit.
Sipas tij, konferenca ndërqeveritare e parashikuar sipas kalendarit për sot, nuk është mbajtur, ndërsa ai pretendon se një seri takimesh dhe mbledhjesh mbi procesin e integrimit janë zhvilluar në Bruksel që nga fillimi i muajit mars, pa transparencë ndaj publikut dhe opozitës.
Berisha tha se në këto takime është diskutuar, sipas tij, për “shkarje të rënda mbrapa” në procesin e integrimit të Shqipërisë dhe se nuk është arritur konsensus për miratimin e raportit IBAR, një dokument i ndërmjetëm vlerësues.
Ai shtoi se kërkesat ndaj Shqipërisë në kuadër të procesit të integrimit janë rritur dhe se disa vende anëtare kanë shprehur kundërshtime, duke ndikuar në ndryshime të raportit dhe kërkesave të tij.
Sipas Berishës, edhe konferenca ndërqeveritare e planifikuar nuk është zhvilluar, ndërsa ai akuzoi qeverinë për mungesë transparence dhe për fshehje të informacionit nga qytetarët.
Ai gjithashtu i bëri thirrje vendeve anëtare të BE-së, Komisionit Europian dhe presidencës së radhës që procesi i integrimit të Shqipërisë të bëhet më transparent për publikun.
