Në ditët më të vështira për qeverinë Rama, në një moment kur hetimet e SPAK po prekin gjithnjë e më shumë struktura dhe figura kyçe të pushtetit, kryetari i opozitës Sali Berisha ka zgjedhur sërish të drejtojë sulmin e tij ndaj kreut të Prokurorisë së Posaçme, Altin Dumani.
Nga foltorja e së hënës, përpara Kryeministrisë, dhe përpara një grushti mbështetësish, Berisha e shpalli publikisht Dumanin si përgjegjës për manipulimin dhe fshehjen e dosjes së AKSHI-t.
“A e dini se çfarë ka ndodhur? Altin Troplini ka përcjellë dosjen e tij tek Prokuroria e Tiranës. Pavarësisht se ishte një akt makabër, një krim, një rrëmbim nga katër persona. E ndjekur trajektorja deri tek tuneli i Qafë-Krrabës, edhe më tutje. Prokuroria e Tiranës bëri atë që i thanë. Firmosi mosfillimin e hetimeve për personin.
Shikoni ku jetojmë dhe ai nuk figuron në dosje fare, sepse ai dinte gjithçka, më shumë se Gerondi. Ai ishte nëndrejtor i AKSHI-t dhe kishte të memorizuara të gjitha abuzimet nga qindra milionë euro, nga familja më e afizuar e Ballkanit, ndoshta e Europës, nga familja Rama”, deklaroi Berisha.
Sipas kryetarit të Partisë Demokratike, personi i përmendur nuk është përfshirë në dosje, pavarësisht rolit dhe dijenisë që, sipas tij, kishte mbi abuzimet financiare të institucionit.
Në të njëjtën dalje publike, Berisha përshëndeti edhe protestën e qytetarëve të Vlorës, të cilët prej disa ditësh janë përballur me mungesën e ujit të pijshëm, duke e cilësuar reagimin e tyre si të drejtë dhe të arsyeshëm.
Në fund të fjalës së tij, kryetari i Partisë Demokratike njoftoi mbylljen e protestave për këtë vit, duke deklaruar se ato do të rinisin në vitin e ardhshëm, pa përcaktuar një datë konkrete.
