Pas daljes nga SPAK, kryetari i Partisë Demokratike Sali Berisha iu rikthye sërish temës së shumëpërfolur të takimit në Aruba, duke bërë një deklaratë që për herë të parë përfshin edhe përfaqësues të qeverisë në këtë ngjarje.
Në një mesazh për qytetarët, Berisha akuzoi kreun e SPAK, Altin Dumani, se po mban në sirtar dosjen e takimit të Arubas. Ai tha se prokurorët me në krye Altin Dumanin dhe në bashkëpunim me McGonigal janë përpjekur të fshehin një nga skandalet më të mëdha të qeverisë shqiptare, ndërsa sipas tij, informacionet për takimet janë zbuluar përmes prokurorive italiane dhe gjykatave belge.
“Natyrisht ky është një peng i parave të krimit që i ka larë dhe shndërruar në pronat e tij dhe nuk i justifikon,” deklaroi Berisha, duke lënë të kuptohet se përfitues të drejtpërdrejtë janë zyrtarë të lidhur me pushtetin. Megjithatë, edhe pse në ditët e fundit ka përmendur shpesh “takimin e Arubas”, Berisha ende nuk ka dhënë asnjë informacion konkret se kush mund të kenë qenë qeveritarët pjesëmarrës në të.
