Kryetari i Partisë Demokratike, Sali Berisha, u pyet për dy orë në SPAK lidhur me ngjarjet e “21 Janarit”. Pas daljes nga Prokuroria, ai u përplas me gazetaren Klodiana Lala mbi të shtënat ndaj protestuesve nga brenda godinës së Kryeministrisë.
Lala e pyeti Berishën se kush kishte dhënë urdhër për të qëlluar ndaj qytetarëve të pafajshëm, ndërsa kreu i PD mohoi kategorikisht çdo të shtënë nga brenda. Duket se pyetja e gazetares nuk i përlqeu Berishës, ndërsa e akuzoi se po dezinformonte. Ndonëse pamjet për atë ngjarje janë publikuar në të gjitha mediat.
Debati i plotë:
Klodiana Lala: Zoti Berisha, disa nga gazetarët që janë këtu të pranishëm kanë qenë të pranishëm edhe në 2011-ën kur ndodhi ngjarja. Demonstrata ishte e dhunshme,por nga ana tjetër nga brenda godinës së kryeministrisë u vranë katër qytetarë të pafajshëm. A mund të na thoni zoti Berisha kush e dha urdhrin të qëllohej ndaj qytetarëve teksa protestonin.
Sali Berisha: absolutisht gënjeshtër me bisht kjo që thua. Jo nga brenda.
Klodiana Lala: Nga ku?
Sali Berisha: Jo nga brenda. Të shtënat janë që të gjitha... merri meqenëse i referohesh mediave, merr filmimet. Ushtarët e gardës kanë qëlluar. Jo nga brenda
Klodiana Lala: Nga godina e kryemnistrisë.
Sali Berisha: Jo nga brenda.
Klodiana Lala: Nga godina e kryeministrisë.
Sali Berisha: The nga brenda, korrigjo këtë njëherë, the nga brenda.
Klodiana Lala: Cili është korrigjimi?
Sali Berisha: Korrigjimi është tjetër
Klodiana Lala: Nga dritarja e godinës së kryeministrisë, gardisti ka qenë i dënuar me vendim të formës së prerë.
Sali Berisha: a po kërkon korrigjimin, ta them unë ty. The një gënjehstër Klodiana Lala: Nuk është gënjeshtër zoti Berisha, është fakt i transmetuar publikisht.
Sali Berisha: Nuk është qëlluar nga brenda kryeministrisë. Është qëlluar nga vendrojet e gardës
Klodiana Lala: Është qëlluar mbi protestuesit.
Sali Berisha: Ta them unë ty... tani shiko, tani po bën punën e tyre ti apo tënden
Klodiana Lala: Bëj punën e gazetarit.
Sali Berisha: Një herë në radhë të parë të jeni korrekt, jo të dezinformoni. Është qëlluar nga vendrojet e gardës.
