Kreu i Partisë Demokratike, Sali Berisha, ka deklaruar se në Kuvend është shkelur rëndë Kushtetuta dhe Rregullorja parlamentare.
Në mbledhjen e Grupit Parlamentar të PD-së, ai akuzoi mazhorancën për përqendrim të pushtetit dhe shtypje të pluralizmit.
Sipas tij, Shqipëria nuk plotëson asnjë standard për anëtarësim në BE, përveç pozicionit të saj gjeostrategjik. Berisha theksoi se vendi është shndërruar në një narko-shtet dhe epiqendër të trafikut të drogës.
“Në parlament u shkel rëndë Kushtetuta dhe Rregullorja. Dënoj me forcë shkeljen e Kushtetutës së vendit. Shteti ligjor është zëvendësuar me narko-shtetin. Shqipëria nuk plotëson asnjë standard për të qenë në BE, përveç pozicionit gjeo-strategjik. Pushteti është përqendruar në një dorë. Mazhoranca përdor institucionet për të shtypur pluralizmin”, tha Berisha.
Ai gjithashtu tha se edhe dekreti i presidentit për ministren virtuale Diella është anti-kushtetues dhe se PD urgjentisht duhet të përgatis një padi në Kushtetuese.
“aktin e pashembullt të presidentit të Republikës i cili dekreton ministër virtual inekzistent duke fyer kushtetutën, vendin dhe presidentin. Dhe e bën këtë si një skllav i vërtet i Edi Ramës. Akt i pashembullt. Unë mendoj se duhet ta nisim urgjentisht këtë dekret në Gjykatë Kushtetuese që të arkivohet në banesën e turpit të historisë”, tha Berisha.
