Pas reagimit të Ambasadës Gjermane në Tiranë, e cila dënoi aktet e dhunës në protestën e opozitës, kreu i PD-së Sali Berisha ka një version krejt tjetër të ngjarjeve: sipas tij, dhunë nuk ka pasur.
Duke folur për mediat, Berisha tha se në protestë kishte vetëm demonstrues të plagosur dhe asnjë efektiv policie, duke e përdorur këtë si argument për të mohuar çdo akt dhune nga ana e protestuesve.
“Ne jemi të përcaktuar për kryengritje paqësore. Por një gjë mund të them: në qoftë se në këtë protestë ka pasur dhjetëra demonstrues të plagosur nga dhuna policore, nuk ka pasur deri më sot asnjë polic të plagosur,” deklaroi ai.
Kryedemokrati theksoi se opozita do të vazhdojë protestat nën moton e “kryengritjes paqësore”, duke mbetur në qëndrimin se përgjegjësia për tensionet në protestë i takon policisë.
