Kreu i Partisë Demokratike, Sali Berisha, e ka nisur vitin 2026 me një tjetër sulm verbal ndaj drejtësisë, duke iu rikthyer akuzave ndaj ish-drejtuesit të Prokurorisë së Posaçme, Altin Dumani.
Nga ambientet e SPAK, Berisha lexoi publikisht mesazhin që la aty, ndërsa përsëriti akuzat e tij të mëparshme, duke deklaruar se veprimet e Altin Dumanit, sipas tij, “nuk do të mbeten pa ndëshkimin e merituar ligjor”. Deklarata u parapri nga një urim formal për Vitin e Ri 2026, por vijoi me një ton të ashpër kritik ndaj drejtësisë dhe figurave që ai i konsideron si kundërshtare të pluralizmit politik.
“Në këtë vit të ri, u uroj një vit me më të mirat për ata dhe më të dashurit e tyre”, deklaroi Berisha, përpara se të lexonte shënimin e lënë në ambientet e SPAK.
Në mesazhin e tij, kreu i PD përdori sërish gjuhë fyese dhe etiketime personale ndaj ish-drejtuesit të SPAK, duke e cilësuar atë “armik të pluralizmit politik” dhe “avokat të McGonigalit”. Berisha shtoi se ndaj tij do të ketë, sipas tij, ndëshkim ligjor në të ardhmen, pa dhënë detaje konkrete se në çfarë baze apo përmes cilave procedura.
