Kryetari i PD, Sali Berisha, duket se po paralajmëron një alenacë me kreun e “Shqipëria Bëhet” Adriatik Lapaj. Edhe në komunikimin e sotëm me qytetarë në rrjetet sociale, Berisha përshëndeti sërish protestën e Lapajt që po mbahet para kryeministrisë dhe për qëndrimin e tij të pandërprerë.
Kreu i PD gjithashtu përsëriti se Lapaj është i mirëpritur edhe në protestën e demokratëve që do të mbahet të hënën para zyrës së Edi Ramës.
“Unë e kam pmbështetur publikisht jo një herë por disa herë dhe e kam përgëzuar zotin Lapaj për protestën e tij. Natyrisht ai përfaqëson një parti politike dhe protestën e bazon tek partia e tij. PD siç e patë ju, filloi protestën e saj të fuqishme, ka filluar protestën e saj para kryeministrisë me qëllim dhe e dyta në parlament. Në datën 22 PD dhe elektorati i saj janë në shesh. Zoti Lapaj është ftuar të ishte i pranishëm në protestën tonë, madje po të donte dhe mund të ishte por ai ka ndjekur, sepse ka të programuar protestën për partinë e tij”, tha Berisha.
Kjo nuk është hera e parë që Berisha mbështet publikisht protestat e Lapajt dhe i ka bërë thirrje që t’i bashkojnë tubimet. Ndërsa ky i fundit nuk i ka komentuar deklaratat e kryedemokratit, duke shtuar dyshimet se po paralajmërojnë një aleancë mes tyre.
