Kompania amerikane e lobimit “Continental Strategy”, e kontraktuar nga Sali Berisha përpara zgjedhjeve të 11 majit, ka nisur përpjekjet për të anuluar shpalljen “non grata” të kreut të PD-së. Në një letër drejtuar Departamentit Amerikan të Shtetit, kompania kërkon heqjen e këtij statusi ndaj Berishës.
Në një material të dërguar institucioneve amerikane, kompania e lidhur me rrethin politik të Partisë Republikane dhe ish-presidentit Donald Trump, argumenton se shpallja “non grata” ishte e motivuar politikisht dhe pa bazë faktike.
“Shpallja sipas nenit 7031(c) e ish-Presidentit dhe ish-Kryeministrit të Shqipërisë, Sali Berisha, duhet të anulohet menjëherë. Ajo ka dëmtuar interesat e politikës së jashtme të SHBA-së dhe ka kontribuar në përkeqësimin e situatës në Shqipëri, që sot kritikët e përshkruajnë si një ‘shtet-narkotik’. Në një kohë kur demokracia në vend është në rrezik serioz dhe Berisha nuk është më një figurë aktive politike, heqja e këtij përcaktimi do të ndihmonte në rikthimin e neutralitetit dhe besueshmërisë amerikane në rajon”, thuhet në dokument.
Megjithatë, mbetet për t’u parë sa bindëse do të jetë kjo strategji, veçanërisht në pjesën ku pretendohet se Berisha nuk është më aktiv politikisht. Në realitet, ai është kryetar i partisë së dytë më të madhe në vend dhe udhëheq opozitën shqiptare.
Për më tepër, ndikimi i tij në politikë mbetet i rëndësishëm, siç dëshmohet edhe nga rezultatet e zgjedhjeve të fundit, ku forca politike që ai përfaqëson siguroi 32.9% të votave dhe 50 mandate në parlament.
Pyetja që shtrohet është nëse argumentet e lobistëve do të jenë të mjaftueshme për të bindur Departamentin e Shtetit, pasi edhe vetë kompania në një letër shoqëruese e pranon se procesi i anulimit të shpalljes “non grata” është tejet i vështirë. Sipas tyre, e vetmja autoritet që mund të marrë një vendim të tillë është Sekretari i Shtetit, ndërsa Berisha nuk ka as të drejtë ankese formale.
Kjo do të thotë se, edhe nëse përpjekjet për heqjen e “non gratës” nuk rezultojnë të suksesshme, pagesa ndaj kompanisë lobuese do të kryhet gjithsesi nga Partia Demokratike.
Sipas kontratës afatgjatë të nënshkruar mes palëve, Continental Strategy do të përfitojë deri në 6 milionë dollarë. Përmes kësaj marrëveshjeje, kompania do të ofrojë shërbime lobimi dhe strategji politike, me qëllim përmirësimin e imazhit ndërkombëtar të PD-së dhe rritjen e ndikimit të saj në qarqet politike në Uashington.
