Kreu i Partisë Demokratike, Sali Berisha, deklaroi se opozita nuk është parti e dhunës dhe se rruga për largimin e kryeministrit Edi Rama nga pushteti do të jetë qëndresa qytetare dhe veprimi demokratik.
Gjatë një fjalimi të mbajtur këtë të premte, Berisha theksoi se opozita e ka nisur betejën e saj në Parlament dhe se protestat do të vijojnë në sheshe, por pa dhunë. Sipas tij, historia ka treguar se ndryshimet e mëdha në Shqipëri janë arritur përmes qëndresës dhe votës, jo armëve.
“Opozita nuk është parti e dhunës. Rruga jonë nuk është dhuna, por qëndresa. Do të zëmë sheshet çdo natë dhe do të qëndrojmë aty deri sa Rama të largohet,” u shpreh Berisha, duke shtuar se opozita është një forcë demokratike e vendosur për të përdorur çdo mjet ligjor dhe politik për ndryshim.
Ai solli në vëmendje edhe periudha të mëparshme historike, duke theksuar se diktatura u përmbys pa armë dhe se edhe kriza e vitit 1997 u zgjidh përmes votës. “Edhe tani do t’i përzëmë me vendosmëri demokratike,” deklaroi ai.
Në një seri takimesh të zhvilluara në Manzë, Sukth dhe Durrës, Berisha foli për rolin e opozitës në një demokraci funksionale, duke e përshkruar atë si mbajtësen e sovranitetit dhe të vullnetit të qytetarëve. Sipas tij, opozita ka detyrën të përfaqësojë interesin e popullit dhe të jetë zëri i lirë kundër abuzimeve të pushtetit.
Berisha akuzoi gjithashtu qeverinë për grabitje të votës në zgjedhjet e viteve 2001 dhe 2021. Ai pretendoi se, në zgjedhjet e fundit, qeveria ka shpërndarë rreth 130 milionë euro në disa qarqe të vendit nën petkun e dëmshpërblimeve nga tërmeti, duke e cilësuar këtë veprim si blerje masive vote.
“Vota vdiq pa hyrë në kuti,” u shpreh Berisha, duke theksuar se shpërndarja e parave publike pak para zgjedhjeve përbën shkelje të rënda të ligjit dhe të standardeve zgjedhore kombëtare e ndërkombëtare.
Në fund, ai kritikoi drejtimin e mëparshëm të opozitës, duke pretenduar se ish-kreu i saj nuk u përqendrua te denoncimi i grabitjes së votës, por te konfliktet e brendshme, duke lënë sipas tij në hije përgjegjësinë e qeverisë.
