Kreu i Partisë Demokratike, Sali Berisha, ka reaguar me tone të forta ndaj projekt-Kodit të ri Penal të propozuar nga mazhoranca, duke e cilësuar atë si një “narkokod” të hartuar në “shpellat e mafies”.
Në një konferencë për mediat, Berisha u shpreh se hartimi i këtij drafti është bërë në mënyrë arbitrare dhe të paprecedentë, pa asnjë konsultim institucional. Si provë të kësaj, ai solli deklaratën e Prokurorit të Përgjithshëm, i cili sipas tij ka pranuar publikisht se nuk është pyetur për projektin.
“Kur thashë se ky kod ka dalë nga shpellat e mafies, pati njerëz që u habitën. Por tani që Prokurori i Përgjithshëm konfirmon se nuk është pyetur fare, kuptohet qartë çfarë përfaqëson ky kod: dyfishimin e dhunës ligjore mbi qytetarët”, tha Berisha.
Ai renditi disa nga nenet më shqetësuese sipas tij, mes të cilave:
burg për parkim, burg për fatura të papaguara të dritave dhe ujit, burg për ndërtim në pronë private,
ndërsa dënimet për zyrtarët e korruptuar, theksoi ai, përgjysmohen.
Berisha e cilësoi draftin si një “atentat madhor ndaj fjalës së lirë dhe të drejtës për të denoncuar padrejtësitë”, duke akuzuar se Kodi synon të mbrojë individë të caktuar si Altin Dumani dhe Irena Gjoka nga çdo kritikë publike. “Në asnjë vend të botës nuk ndalohet kritika ndaj vendimeve gjyqësore. Ky Kod synon të frikësojë qytetarët dhe gazetarët”, u shpreh ai.
I pyetur për qëndrimin e Partisë Demokratike në raport me Kuvendin pas zgjedhjeve të 11 majit që, sipas tij, nuk njihen nga PD, Berisha tha se gjithçka do të vendoset nga forumet e partisë. Ai nuk përjashtoi mundësinë e bojkotit parlamentar në shtator.
Ndërsa për një riformatim të forumeve të brendshme të PD-së, ish-kryeministri la të kuptohet se një lëvizje e tillë nuk është në planet e afërta.
