Kreu i PD-së, Sali Berisha, në deklaratën e sotme për mediat akuzoi median se i shërben qeverisë dhe se Edi Rama përcakton temat e debateve televizive.
Teksa komentoi procesin gjyqësor ndaj Ilir Meta dhe mbajtjen e tij në një kafaz të qelqtë gjatë seancave, Berisha shkoi më tej në krahasime, duke e lidhur Metën me Havzi Nela dhe duke pretenduar se Rama po hakmerret ndaj tij njësoj siç, sipas tij, kishte vepruar i ati i kryeministrit ndaj poetit. Ndërsa përdori këtë çështje për të thënë se mediat e kanë injoruar, pasi sipas tij, janë të kapura nga kryeministri.
“A patë ndonjë koment në media ju për këtë çështje? A dëgjuat ju ndonjë emision për një akt terroritzues, torturues psikologjik publik që krhet ndaj ish-presidentit të vendit, as edhe një? Ndaj dhe revolta ime, censura është akti më i shëmtuar. Në studio mund të dëgjoni çdo debat, por temat vijnë nga lartë. Kjo nuk lejohet”, tha Berisha.
Por ndërsa denoncon atë që e quan “diktat të Ramës ndaj mediave”, kryedemokrati duket se bie në të njëjtën logjikë që kritikon. I pyetur për përplasjet me Ervin Salianji, ai nuk kurseu akuzat as ndaj pronarit të mediave Irfan Hysenbelliu, duke pretenduar se ky i fundit kishte publikuar 16 lajme brenda katër orësh për ish-deputetin që e sfidoi për drejtimin e PD-së.
“Fania vet persdonalisht publikon në 4 orë 16 lajme, ai ia nxin faqen medias. Nga faqe gazetarësh profesionistësh, e shndërron në faqe të Fanes. Edhe unë nuk mund të hesht. A mund të pranoj të listohen 16 lajme në katër orë, si mund të bëhet?”, tha ai.
Përtej paradoksit të deklaratave, mbetet një pyetje thelbësore: kur vetë Berisha ushtron presion ndaj pronarëve të mediave për të kufizuar hapësirën e kundërshtarëve të tij brenda partisë, mbi ç’bazë kërkon standarde nga “vëllai siamez” që, sipas tij, ndodhet në qeveri?
