Kryetari i Partisë Demokratike, Sali Berisha, në një konferencë për mediat sot, sulmoi ashpër komisioneren për Zgjerimin, Marta Kos, dhe ambasadorin e BE-së në Tiranë, Silvio Gonzato. Komentet për komisioneren e BE ishin vazhdën e kritikave të përfaqësuesve të PD, ndërsa Berisha shtoi se Kos ka shkelur ligjet ndërkombëtare dhe është një adhuruese pa kushte e Edi Ramës.
“PD pas deklaratës së zonjës Kos bëri një deklaratë të cilën e dënoi publikisht dhe gjerësisht. Deklaratën e frymëzuar të zonjës Kos, nga propaganda e paguar e Edi Ramës, ekstremizmi politik i majtë apo dezinformimi, si një deklaratë që shkel rëndë ligjin ndërkombëtar të vlerësimit të zgjedhjeve. Para se të vija këtu ka patur një reagim nga ana e zëdhënësit të Komisionit Europian, i cili shpreh qëndrimin korrekt të KE, të papajtueshëm me qëndrimin e zonjës Marta Kos, një adhuruese pa kushte e Edi Ramës dhe bëmave dhe gjëmave të tij”, deklaroi Berisha.
Kreu i PD nuk kurseu as ambasadorin e BE, Suilvio Gonzato, për të cilin tha se përcjell propagandën e Edi Ramës në Parlamentin Europian duke thënë se kryetari i PD nuk është pro-perëndimor. Edhe për Gonzaton, Berisha tha se po paguhet nga propaganda e Edi Ramës.
“Të ngjashme me qëndrimet e ambasadores Kos, janë qëndrimet e ambasadorit Gonzato, i cili është një përçues i propagandës të paguar të Edi Ramës dhe i dezinformimit të papërmbajtur. Lidhur me këtë të fundit, unë ju kam informuar ju se ky zotëri, për të përcjell propagandën e Edi Ramës, iu thotë deputetëve të Parlamentit Europian se kryetari i PD nuk është pro-perëndimor, pasi agjenda e tij është MAGA dhe jo integrimi. Ky është një trillim, një mashtrim dhe e dënoj”, tha Berisha.
