Kreu i PD, Sali Berisha, u ka bërë thirrje qytetarëve që t’i bashkohen protestës kombëtare që do të mbahet sot para Kryeministrisë.
Në deklaratën për mediat, Berisha nuk zbuloi shumë detaje për skenarin se çfarë pritet të ndodhë, ndërsa përsëriti se do të jetë një kryengritje e fuqishme paqësore.
“Skenari i protestës është skenari i një kryengritjeje të fuqishme paqësore, që do të përcillet sot më shumë se kurrë në vatrat e të gjithë shqiptarëve, por edhe në Bruksel, SHBA dhe qendra të tjera kryesore. Skenari i sotëm zhvillohet pas dështimit të fazës së parë të grushtit të shtetit dhe pas inicimit të fazës tjetër nga Edi Rama”, tha Berisha.
Ai akuzoi kreun e qeverisë se po dëmtonte integrimin e Shqipërisë dhe se shpresa e vetme e qytetarëve, sipas tij, ishte vetëm opozita.
Ndërkohë, ai njoftoi se shumë shpejt do të ketë protesta para selive diplomatike shqiptare nëpër botë.
