Sali Berisha deklaroi se opozita nuk do të bashkojë asnjë votë me mazhorancën për ndryshimet ligjore të propozuara, të cilat ai i cilësoi si antikushtetuese.
“Ato janë ndryshime antikushtetuese dhe ne nuk bashkojmë kurrë asnjë votë me Edi Ramën. Kjo të jetë shumë e prerë”, tha ai.
Duke vijuar deklaratën e tij, Berisha denoncoi si “akt jashtëzakonisht të rrezikshëm” vendimin e kryetarit të Gjykatës së Lartë, Sokol Sadushi, të cilin e akuzoi se po vepron si “partizan i Edi Ramës”.
“Me vendimin që ka bërë, ai e ka shndërruar Shqipërinë në vendin më të rrezikshëm. Është shumë herë më i rrezikshëm pasi u krijon mundësi të gjithë kriminelëve të arratisen dhe nuk do ketë më kriminelë në bankën e akuzës”, u shpreh Berisha.
Sipas tij, ky vendim krijon një mburojë për krerët e organizatave kriminale, pavarësisht nëse janë zyrtarë apo jo, dhe përbën rrezik për gjithë rajonin.
Berisha shtoi se edhe në pesë vitet e fundit një numër i madh mandatesh arresti ndaj bosëve të krimit nuk janë ekzekutuar.
“Gjatë 5 viteve të shkuara, 252 mandate të bosëve të krimit nuk u ekzekutuan, por mbetën të lirë në Shqipëri dhe në vende të tjera. Kur mandatet ekzekutoheshin vetëm 15 për qind e tyre, tani do të jetë 0 për qind”, tha ai.
Sipas Berishës, me këtë vendim të Sadushit, mandatet e arrestit rrezikojnë të përfundojnë të gjitha në arrati dhe në kërkim.
