Partia Demokratike do të mbajë protestën e radhës kombëtare më 12 mars. Datën e bëri publike sot kreu i PD-së, Sali Berisha, në një deklaratë për mediat para mbledhjes me grupin parlamentar demokrat.
E enjtja e javës së ardhshme duket të jetë edhe dita kur në Parlament mund të shqyrtohet imuniteti i Belinda Ballukut. Kujtojmë se një ditë më parë Berisha deklaroi për mediat se protesta e radhës do të thirrej pikërisht në ditën kur do të shqyrtohej imuniteti i ish-zëvendëskryeministres.
Megjithatë, mbetet për t’u parë, pasi deri më tani nuk ka një konfirmim zyrtar për çështjen në fjalë.
Më tej, Berisha akuzoi kryeministrin Edi Rama lidhur me editorialin e përbashkët me Aleksandar Vuçiç, duke pretenduar se po tenton të devijojë orientimin 33-vjeçar të shqiptarëve drejt Evropës.
Kryedemokrati u shpreh se Rama po vepron në këtë mënyrë për shkak se, sipas tij, ndodhet “me shpatulla pas muri” përballë dosjeve që rëndojnë ndaj tij dhe familjarëve të tij.
