Sali Berisha zgjodhi një komunikim në Facebook me qytetarët për të shpallur Partinë Demokratike si forcën më demokratike në Shqipëri, madje duke pretenduar se sfidon edhe partitë simotra në Europë.
“Partia Demokratike ka garën më të ndershme dhe formën më demokratike të garës që mund të ekzistojë”, u shpreh ai, duke theksuar se ndryshe nga shumë parti europiane ku kryetarët zgjidhen nga forumet, në PD vendos anëtarësia.
Berisha kërkoi që demokratët të mos bien “viktimë e propagandës”, duke akuzuar kundërshtarët se prej vitit 2009 kanë zhdukur votën e lirë dhe madje kanë mobilizuar “mafien më të rrezikshme të kokainës” kundër PD. Sipas tij, gara është e hapur për këdo që plotëson kriteret dhe përbën momentin më të rëndësishëm për përfaqësimin e anëtarësisë.
Përtej këtij përshkrimi të një procesi ideal, realiteti në fakt është krejt ndryshe. Sepse në këtë “formë më themelore të demokracisë”, deri tani në garën për kryetar të PD mbetet vetëm një kandidat: vetë Sali Berisha.
Dhe kështu, mes fjalëve për konkurrencë dhe hapje, PD po zhvillon ndoshta garën e saj më të qartë ndonjëherë — një proces ku rezultati nuk pret votën për t’u konfirmuar.
