Sali Berisha u paraqit sërish këtë të hënë në ambientet e SPAK, në zbatim të masës së detyrimit për paraqitje të vendosur nga Gjykata për çështjen e privatizimit të ish-klubit sportiv “Partizani”. Para gazetarëve, Berisha lëshoi akuza të forta ndaj kreut të SPAK, Altin Dumani, të cilin tashmë e quan me ironi “Altin Troplini”, duke e akuzuar si mbrojtës të karteleve të drogës.
Sipas ish-kryeministrit, Dumani po bashkëpunon me krimin e organizuar, duke i informuar krerët e bandave përpara se të lëshohen urdhër-arrestet. Ai përmendi rastin e Elvis Doçit dhe pretendoi se “250 urdhërarreste kombëtare dhe ndërkombëtare nuk janë ekzekutuar”, ndërsa bandat vijojnë të jenë të lira në territorin e Shqipërisë.
“Altin Troplini është shpallur president nderi i kartelit Troplini nga vetë Elvis Doçi, për mbështetjen që i ka dhënë këtij grupi kriminal. Në kohën e Prokurorisë së Krimeve të Rënda ekzekutimi i mandateve të arrestit shkonte deri në 90%, ndërsa sot për bosët e krimit nuk kalon as 10%”, deklaroi Berisha.
Ndërkohë, Berisha doli në mbrojtje të prokurores së Shkodrës, Elsa Gjeli, dhe gjyqtarit Hazbi Balliu, të cilët janë sulmuar ditët e fundit nga kryeministri Edi Rama në kuadër të operacionit për lirimin e hapësirave publike.
“Rama e sulmoi me egërsi prokuroren Gjeli për zbatimin korrekt të raportit të Policisë së Shkodrës dhe më pas iu vërsul gjyqtarit Balliu, i cili zbatoi një vendim të qeverisë për të njohur të drejtën e parablerjes. Dhe askush nga institucionet e drejtësisë nuk i doli në mbrojtje. Heshtje varri,” shtoi ai.
Në deklaratën e tij, Berisha akuzoi gjithashtu KLGJ-në për mbrojtje selektive, duke përmendur rastin e gjyqtares Irena Gjoka, për të cilën tha se ka mashtruar në vetting dhe ka tri vepra penale në ngarkim.
