Kreu i PD, Sali Berisha, vizitoi mbrëmjen e sotme në urgjencën QSUT deputetët dhe qytetarët të lënduar gjatë përplasjeve me policinë në protestë. Ai takoi deputetët Luçiano Boçi dhe Klevis Balliu, si edhe gazetarin Aulon Kalaja, i cili përveç ekspozimit ndaj gazit lotsjellës, është goditur edhe me shkop gome.
Në një deklaratë për mediat nga ambientet e QSUT, Berisha dënoi ndërhyrjen e Policisë së Shtetit, duke e cilësuar atë si të dhunshme ndaj protestuesve. Ai akuzoi drejtues të policisë se përdorën verbues arinjsh si dhe se janë përdorur granata zhurmuese.
“Egërsia e përmasa shtazarake e mercenarëve të Edi Ramës, Enton Alushi një mercenar i karteleve të drogës. U sollën në mënyrën më shtazore ndaj protestuesve, janë përdoru helme e substanca që janë krime në konventa. U përdorën helme që përdoren kundër arinjve. Kanë përdorur sasi të mëdha ndaj Luçiano Boçit, Klevis Balliut, Flamur Nokës, Ivi Kasos, dhe një seri protestuesish. Përveçe verbuesit të arinjve, kanë goditur shkop një pjesë delikate për jetën e njeriut. Janë përdorur bomba, i janë hedhur protestuesve granata zhurmuese, që janë plagosur”, u shpreh Berisha.
