Kryetari i Partia Demokratike e Shqipërisë, Sali Berisha, zhvilloi sot një takim me demokratët në Krujë, në kuadër të mobilizimit për protestën e paralajmëruar më 20 shkurt. Në fjalën e tij, Berisha bëri thirrje për pjesëmarrje në protestë dhe hodhi akuza të forta ndaj qeverisë, duke pretenduar se mediat në vend janë të kontrolluara nga pushteti.
Por momenti që ra më shumë në sy ishte deklarata e tij se situata mediatike sot është më e keqe se gjatë regjimit komunist, ku – sipas tij – qytetarët orientoheshin më lehtë falë burimeve alternative të informacionit si VOA, Radio Vatikani apo televizionet italiane.
Ironia e situatës qëndron në faktin se vetë takimi i Berishës në Krujë u transmetua live nga të paktën pesë televizione njëkohësisht, ndërsa deklaratat e tij të përditshme vijojnë të transmetohen në kohë reale nga pothuajse të gjitha mediat audiovizive në vend. Ndërsa ai fliste për një realitet mediatik të “pushtuar”, regjia e takimit të tij pasqyrohej direkt në disa ekrane.
Gjatë fjalës së tij, Berisha akuzoi qeverinë se përdor taksat e qytetarëve për propagandë dhe se kjo, sipas tij, ndikon në deformimin e votës dhe në largimin e shqiptarëve nga vendi. Ai e krahasoi situatën në Shqipëri me modele autoritare në rajon, duke folur për ndikimin e krimit dhe parasë së drogës në politikë.
Takimi në Krujë shërbeu si një tjetër etapë e fushatës së opozitës për protestën e 20 shkurtit.
