“Në fakt, kurrë një njeri që beson se zbatimi i ligjit dhe i Kushtetutës është kusht për lirinë dhe të drejtat njerëzore nuk mund të ketë asnjë hezitim ndaj atyre që zbatojnë ligjin. Kam admirim për çdo njeri që zbaton ligjin, por nuk bie dakord me ata që fshehin krimet në SPAK”.
Kështu u shpreh sot Sali Berisha, duke vijuar të mbajë një qëndrim me dy standarde ndaj Prokurorisë së Posaçme. Në deklaratat e tij, Berisha dallon mes prokurorëve “të mirë” kur hetojnë qeverinë dhe atyre “të këqij” kur hetojnë opozitën.
Sipas tij, në SPAK ka edhe prokurorë të guximshëm, të cilët morën të pandehur zëvendëskryeministren, një veprim që, sipas Berishës, duhet vlerësuar. Por nga ana tjetër, ai e cilësoi si “SKAP” SPAK-un kur heton përfaqësues të opozitës ose kur, sipas tij, shtyhen çështje të tjera.
“Kjo është drejtësi në këmbët e një organizate kriminale, në të cilën ka edhe njerëz që kanë guxim dhe zbatojnë ligjin”, tha më tej kryetari i Partisë Demokratike.
Në fund të fjalës së tij, Berisha bëri edhe një herë thirrje për mbështetje, duke ftuar shqiptarët t’i bashkohen protestës së demokratëve ditën e hënë.
