Seanca e radhës plenare në Kuvendin e Shqipërisë është shoqëruar me tensione që në nisje të saj, për çështjen e Belinda Ballukut.
Situata u përshkallëzua pas fjalës së kreut të PD-së, Sali Berisha, i cili akuzoi mazhorancën se po mbron interesat e zëvendëskryeministres dhe ministres së Infrastrukturës. Gjatë fjalës së tij, Berisha përdori edhe gjuhë të ashpër ndaj mazhorancës, duke deklaruar se parlamenti është “strofull e mbrojtjes së hajdutëve”.
“Siç e shihni parlamenti është strofull e mbrojtjes së hajdutëve. Këta që janë pas shpinës time dhe këta të këtij krahu janë maska e Lubisë dhe Ramës. Kurrë nuk keni patur në këtë sallë një grup njerëzish që shkelmojnë mbi interesat tuaja jetike për të mbrojtur vithet e Belindës, në të vërtetë Edi Ramën”, u shpreh Berisha.
Pas kësaj deklarate, fjala e tij u ndërpre nga drejtuesi i seancës, Niko Peleshi, i cili reagoi duke thënë se një fjalor i tillë nuk do të tolerohej në sallë.
“Sa të jem unë këtu nuk e toleroj këtë fjalor. Ulu. Të ndërpres fjalën”, deklaroi Peleshi.
Pas ndërprerjes së fjalës së Berishës, deputetët e Partisë Demokratike bllokuan foltoren, duke rritur më tej tensionet në sallën e Kuvendit.
