Sali Berisha ka reaguar ndaj kritikave se rezoluta e përbashkët e votuar me mazhorancën për integrimin europian nuk përfshin akuzat më të forta të opozitës ndaj qeverisë së Edi Ramës.
Gjatë deklaratës së tij, Berisha pranoi se në tekst nuk përmenden drejtpërdrejt emra apo çështje konkrete, por argumentoi se problematikat e ngritura prej opozitës janë të “nënkuptuara në çdo paragraf” të rezolutës.
“Në mënyrë absolute, në atë rezolutë, nga rreshti i parë tek rreshti i fundit, nuk shprehet asnjë vlerësim, qoftë edhe më i vogli, për punën e parlamentit dhe qeverisë në procesin e integrimit”, deklaroi ai.
Sipas Berishës, mungesa e referencave direkte ndaj aferave që opozita ka denoncuar ishte kusht për arritjen e dakordësisë politike.
“Nëse ne do të kërkonim që tek AKSHI, kopshti privat i Edi Ramës, të dilte emri i Linda Ramës, tek aferat e Belinda Ballukut, të Edi Ramës dhe të tjerë, sigurisht që Edi Rama nuk do t’i lejonte kurrë deputetët e tij ta votonin”, tha kreu i PD-së.
Ai përmendi edhe rastin e Olta Xhaçkës, duke thënë se “rasti i Olta Xhaçkës” është “me vetëkuptim” në pjesët e rezolutës ku kërkohet zbatimi i vendimeve të institucioneve dhe forcimi i rolit të parlamentit.
Berisha argumentoi se dokumenti në thelb përfaqëson qëndrimin e opozitës të mbajtur prej dy vitesh: mbështetje për integrimin europian, por me bindjen se Shqipëria nuk plotëson standardet reale përveç kriterit gjeopolitik.
“Rezoluta nga alfa tek omega shtron kërkesa dhe nuk ka asnjë vlerësim për qeverinë. Në çdo frazë bën të qartë problematikat e mëdha që duhet të adresohen”, deklaroi ai.
Sipas Berishës, votimi unanim nuk duhet lexuar si mbështetje për qeverinë, por si një konfirmim i “konseguencës së PD-së ndaj integrimit të bazuar në meritë dhe performancë”.
