Kryetari i Partisë Demokratike, Sali Berisha, edhe sot nuk la pa përmendur “dosjen Aruba”, të cilën e sheh si selinë e koordinimit të kryeministrit Edi Rama me grupet kriminale. Mirëpo, kur pyetet për hapa konkretë, si ngritja e një komisioni hetimor, kreu i PD-së duket se preferon të flasë më shumë për vendin e takimeve sesa për ndonjë dokument konkret në Kuvend. Ndërsa duket se ka humbur shpresat edhe për një bashkërendim me ndërkombëtarët.
“Ne sigurisht që insistojmë dhe do bëjmë gjithçka. Përsa u përket partnerëve ndërkombëtar, ne në tërësi konstatojmë me kënaqësi se kemi një mbështetje në këtë betejë. Sikundër ka edhe të tjerë po të faktorit ndërkombëtarë që vazhdojnë të mbështesin narkoshtetin me të gjithë fuqinë e tyre”, tha Berisha, duke i ndarë ndërkombëtarët në “të mirë” e “të këqij”, sipas shijes së momentit.
Për zgjedhjet e ardhshme në Bashkinë e Tiranës, Berisha siguroi se opozita ka disa kandidatë, edhe pse asnjë emër nuk u përmend.
“Ju garantoj se opozita sot, në këtë moment që flasim ka jo një, por disa kandidate dhe kandidatë të pakrahasueshëm me korbën e korrupsionit”, tha ai, duke lënë publikun të hamendësojë se kush fshihet pas fjalëve.
Ndërkohë, padia e kryebashkiakut Erion Veliaj në Gjykatën Kushtetuese po ecën me ritme më të shpejta se gjetja e kandidatit të opozitës. Sipas Berishës, ky veprim i Veliajt tregon se marrëveshja e tij me Ramën nuk është më në fuqi. Një tjetër lajm për konsum politik, derisa të vijë koha për të folur për emrat konkretë, meqë janë “disa” por që asnjë s’po del vullnetar!
