Pas përfundimit të mbledhjes së Këshillit Kombëtar të Partisë Demokratike, Sali Berisha deklaroi se nuk i lëviz “asnjë presje” qëndrimit të mbajtur në konferencën për shtyp të mesditës lidhur me turin e organizuar nga Ervin Salianji.
Në prononcimin për mediat, Berisha theksoi se qëndrimi i PD-së është absolut dhe i pandryshueshëm kur bëhet fjalë për bashkëpunimin me bandat, duke e cilësuar këtë si “vijë të kuqe” për partinë.
“Gjithçka kam pasur për këtë çështje e kam shprehur si kryetar i PD dhe asgjë nuk e lëviz,” u shpreh Berisha.
I pyetur për akuzat e Ervin Salianjit ndaj Arjan Ndojit, Berisha u përgjigj shkurt se i qëndron plotësisht deklarimeve të tij të mëparshme. “Bandat janë vija e kuqe për PD,” përsëriti ai.
Në pyetjen direkte nëse Salianji përjashtohet nga Partia Demokratike, Berisha u mjaftua me përgjigjen: “Shih statutin.”
Më tej, ai shtoi se “nuk kam thënë që s’ka vetëpërjashtime”, duke e lënë kështu të hapur mundësinë që çështja e Salianjit të përfundojë me përjashtim nga radhët e PD-së.
