Kryetari i PD, Sali Berisha, ka përshëndetur gjyqtarët e Gjykatës Kushtetuese që votuan kundër dekretit të presidentit për shkarkimin e Veliajt. Ndonëse herë pas here e quan Gjykatën Kushtetuese të kapur nga Rama dhe shkel ligjet e vendit, në konferencën e sotme për mediat Berisha kishte zgjedhur të lavdëronte gjyqtarët, pasi sipas tij kanë zbatuar parimin ndërkombëtar të shprehur qartë nga Komisioni i Venecias. Ndërsa nuk harroi të qajë sërish hallin e Veliajt, duke thënë se u trajtua në burg nga Rama “si vrasës serial”.
“Pavarësisht komenteve të ndryshme, qëndrimi im është ky. Ata gjyqtarë që votuan kundër dekretit të Presidentit dhe vendimit të Këshillit të Ministrave, zbatuan parimin ndërkombëtar të shprehur qartë nga Komisioni i Venecias. Ata thonë se i nxiti ky e i nxiti ai, ata kanë votuar në përputhje me atë direktivë. Rama thotë ta nxjerrin nga burgu? Por e dëgjuat ju, i kishte caktuar regjimin e serial killer, në qeli thotë Erion Veliaj u trajtova në regjimin e vrasësit serial,” tha Berisha.
Kreu i PD gjithashtu komentoi pagesën milionëshe ndaj LaCivita dhe ekipit të tij, të cilën e justifikoi duke thënë se shifrat e bëra publike përgënjeshtruan mashtrimet e Ramës dhe ishin 15 herë më të ulëta. Ndonëse strategët amerikanë rezultoi se erdhën në Shqipëri për të bërë disa qejfe në Tiranë dhe e bënë më qesharake superhumbjen e opozitës, Berisha e quajti ekipin e LaCivita si më seriozin në botë, pa komentuar masazhet indiane që u kishin paguar.
“Çdo shqiptar mësoi dje se shifra e paguar ishte 14 herë më e vogël se ajo që shpalli Rama dhe makineria e tij e mashtrimit. Nëse shkoni në mars të këtij viti, do gjeni shifra 22 mln etj. Shqiptarët e panë se kjo shifër ishte 15 herë më e ulët në të vërtetë. Tullumbacja e skandalit të tyre u shfry dhe atyre u ngeli mashtrimi në dorë. Ekipi i LaCivita ishte ekipi më serioz i botës me eksperiencën më të jashtëzakonshme dhe bëri më të mirën e mundshme, organizuan një fushatë elektorale që nuk e kishin parë kurrë,” tha Berisha.
Kryetari i PD-së më tej komentoi tërheqjen e Bujar Leskajt nga funksionet brenda kësaj partie, duke marrë përgjegjësinë për humbujen në 11 maj. Ndonëse duhej të kishte dhënë dorëheqje vet dhe duhej ta kishte kërkuar të njëjtën gjë edhe nga drejtuesit e tjerë për humbjen e rëndë në zgjedhje, Berisha vetëm vlerësoi dorëheqjen e deputetit të PD.
“E vërtetë është ajo. Bujar Leskaj ka ardhur më ka dhënë dorëheqjen. Dhe unë ia pranoj atë dorëheqje si drejtues qarku. Nuk kam më komente. Ai e ka bërë publike. Vlerësoj dorëheqjen e tij. Sugjerimi i tij, është sugjerimi i tij, por si hap këtë deklaroj”, tha Berisha.
Kryedemokrati gjithashtu lëshoi premtime të tjera për protesta dhe tha se është i vetëdijshëm që i kanë vonuar, por pa dhënë një datë fikse se kur do fillojnë pavarësisht isistimit të gazetarëve.
