Kryetari i Partisë Demokratike, Sali Berisha, ka folur sot para Kuvendit kundër projektligjit për barazinë gjinore, duke e cilësuar atë si një nismë që “rrezikon të shkatërrojë familjen shqiptare dhe vlerat tradicionale”. Sipas Berishës, projektligji është i ndërtuar mbi “ideologjinë e ekstremit të majtë” dhe bie ndesh me kushtetutën, kodet ligjore dhe trashëgiminë mijëvjeçare të vendit.
“Kjo nismë çon drejt shkatërrimit të familjes, themelit të shoqërisë. Është një ligj që përmbys vlerat dhe penalizon ata që mbrojnë familjen. Në emër të përafrimit me direktivat europiane, po bëhet një mashtrim i madh. Ky ligj na çon drejt totalitarizmit, i ngjashëm me atë që shpalli Shqipërinë shtet ateist”, tha Berisha.
Kreu i PD pati një mesazh edhe për ambasadorin e BE në Tiranë, i cili ka kërkuar që të votohet ligji. Berisha u shpreh se opozita respekton orientimin seksual të çdo individi, por kundërshton imponimin e standardeve të shumëfishta gjinore. Ndërsa i kërkoi ambasadorit të dalë t’u tregojë shqiptarëve se cila dirktivë e BE bën fjalë për përkatësi të shumëfisht gjinore.
“Ambasadorit të BE i them kaq unë. Zotëri, ne absolutisht respektojmë orientimin seksual të çdo njeriu. Por përpjekjet tuaja për t’i imponuar shoqërisë shqiptare standarte të përkatësisë të shumëfisht gjinore në diversitet të gjerë, përvç asaj binare, edhe i them këtu edhe në statusin tënd ti je binar. Ne nuk merremi me trajtimin, ka fëmij, ka pasur grua, ka marrë vendimet e veta mbrapa siç ka shpjeguar jetën personale se unë sdua të merem me jetën e tij personale fare. Le t’u thotë shqiptarëve cila direktivë e BE bën fjalë për përkatësi të shumëfisht gjinore,” deklaroi ai.
Ndërkohë, përpara godinës së Kuvendit po zhvillohet një protestë e organizuar nga Koalicioni “Pro familjes dhe jetës”, kundër miratimit të këtij projektligji.
