Sali Berisha doli sot në konferencë shtypi për të sulmuar sërish Gjykatën Kushtetuese për zvarritjen e vendimit në çështjen Balluku. Retorika ishte e ashpër: GJK u quajt “strofulla e fundit e hajdutëve të shqiptarëve”, një formulim që e vendos gjykatën nën një presion të drejtpërdrejtë politik.
Por përtej tonit, ajo që bie në sy është një fakt politik: Berisha po vepron në të njëjtën linjë presioni mbi drejtësinë dhe posaçërisht mbi GJK si Edi Rama.
Në fillim të janarit, Gjykata Kushtetuese reagoi publikisht ndaj sulmeve të kryeministrit Edi Rama, duke i cilësuar ato si presion të papranueshëm ndaj një institucioni të pavarur. Ai reagim u lexua si një akt mbrojtjeje i pavarësisë së drejtësisë.
Sot situata është simetrike: Berisha po ushtron të njëjtin lloj presioni publik mbi GJK, madje me gjuhë edhe më stigmatizuese. Në këtë pikë, GJK ka një detyrim moral dhe institucional të reagojë në mënyrë të barabartë — jo vetëm ndaj Ramës, por edhe ndaj Berishës.
Kjo jo për të mbrojtur njërën palë politike, por për të mbrojtur parimin: askush nuk ka të drejtë të kërcënojë, intimidojë apo delegjitimojë Gjykatën Kushtetuese.
Problemi është se, në sulmet e tyre ndaj kësaj gjykate por edhe ndaj drejtësisë në përgjithësi, as Rama dhe as Berisha nuk po nisen nga interesi publik për drejtësinë, por nga interesa të ngushta politike. Të dy po e trajtojnë GJK-në si fushë beteje, jo si garant të Kushtetutës.
Nga ana tjetër, po sot në konferencë për shtyp Berisha kritikoi mekanizmin e pagave të magjistratëve, duke pranuar se aktualisht ekziston një problem serioz në këtë skemë. Kjo është e saktë në thelb: sistemi i pagave është përçarës dhe diskriminues mes prokurorëve e gjyqtarëve.
Por këtu qëndron paradoksi politik. Berisha sulmon sot skemën e pagave të vitit 2016. Por ai qëllimisht harron se në vitin 2023 ka qenë bashkëautor i prishjes së skemës ligjore, së bashku me votat e deputetëve të tij dhe të Ramës.
Pikërisht kjo prishje ligjore është baza mbi të cilën shoqatat e prokurorëve dhe gjyqtarëve kanë ngritur pretendimin për diskriminim në paga. Me fjalë të tjera, Berisha po kritikon sot një problem që vetë e ka ndihmuar të krijohet dje.
Ky akt e vendos kryetarin e PD-së në një sinkron të heshtur, por të qartë, me Edi Ramën: të dy kanë ndërhyrë në arkitekturën ligjore të sistemit të drejtësisë, dhe sot të dy ankohen për pasojat.
