Kryetari i Partisë Demokratike, Sali Berisha, në konferencën e sotme për mediat ka komentuar kabinetin e ri qeveritar. Berisha akuzoi Ramën për diskriminim të hapur ndaj veriut të Shqipërisë.
Sipas tij, në përbërjen e qeverisë së re nuk figuron asnjë përfaqësues nga veriu, çka tregon një urrejtje të papërmbajtur dhe të pashembullt ndaj kësaj zone.
“Natyrisht me sa shoh unë këtu do më falni por është shprehur urrejtje patologjike për veriun, asnjë nga veriu në kabinet. Ky është kabineti i parë në të cilin ka shprehur urrejtjen e tij të papërmbajtur ndaj veriut të Shqipërisë dhe kjo nuk është rastësi. Kurrë pushtues apo diktatorë që të ketë mbajtur këtë qendrim që mban ky ndaj veriut nuk ka patur dhe nuk ka. Investimet në veri janë më pak se 1 e 13 e investimeve në zonat e tjera të Shqipërisë”, tha Berisha.
Kreu i PD gjithashtu prezantoi sot edhe kryetarin e grupit parlamentar i cili do të vijojë të jetë Gazment Bardhi. Ndonëse patën përlasje të forta me njëri-tjetrin në parlamentin e shkuar, Berisha vlerësoi Bardhin se e ka drejtuar me dinjitet grupin parlamentar në një kohë të vështirë.
Poste të reja marrin dy deputetët Belind Këlliçi dhe Tomorr Alizoti, të cilët janë emëruar nënkryetar të grupit parlamentar.
Kreu i PD nuk ndryshoi as postin e opozitës për nënkryetar Kuvendi, i cili do të vazhdojë të jetë deputeti Agon Gjekmarkaj.
Ndërsa sekretare e Grupit është zgjedhur deputetja Elda Hoti dhe zëdhënëse Ledina Alolli.
