Kryetari i Partisë Demokratike, Sali Berisha, publikoi një postim në rrjetet sociale ku pretendonte se Tom Doshi është larguar pas një urdhër-arresti nfdaj tij, dhe akuzon SPAK-un për manipulim të informacionit. Sipas kryedemokratit, Doshi ishte larguar drejt një destinacioni të panjohur për t’i shpëtuar arrestimit të paralajmëruar dhe për t’u dorëzuar më pas “në SKAP”.
“Toma ia mbathi! Miq, gosipi i qytetit gumëzhiti mbrëmë anë e kënd e qoshe-qoshe të Tiranës se Tom Doshi u arrestua, se Tom Doshit i kanë prerë urdhër-arrestin skapistët e partisë dhe se Tom Doshi ishte diku larg apo te Rrapi e Treshit dhe sot në mëngjes do paraqitej burrërisht në SKAP për tu burgosur. Sot në mëngjes gosipin e mori era dhe bashkë me të edhe urdhër-arrestin për Doshin, aleatin besnik të Ramaduros. Toma, që pardje ishte në Skap dhe dje u largua në drejtim të paditur, mbasi u urdhërua që t’ia mbathi. Rroftë drejtësia e Partisë së Krimit”, shkruan Berisha.
Por menjëherë ka reaguar kreu i PSD, Tom Doshi, duke e përgënjeshtruar Berishën. Doshi ka postuar një foto në facebook ku shfaqet duke pirë kafe në qendër të Tiranës, pak metra nga selia e PD dhe i referohet Berishës si mashtrues që ka 20 vite që shpif ndaj tij.
“O Sali mashtruesi! Për 20 vjet ke shpif kundër meje. Nuk jam largu, jam këtu, në mes të Tiranës duke e pi kafen mes miqsh e jo mes paranojash. Nuk frikësohem se nuk e kam vjedhur popullin si ti!”
Duket se dy krerët e partive kanë vendosur të luajnë hapa dollapa me hallin që kanë të dy me SPAK.
