Kryetari i Partisë Demokratike, Sali Berisha, ka bërë përgjegjës Edi Rama për ngjarjet e 21 janarit, 15 vite më parë, ku gjatë protestës së opozitës u vranë katër protestues.
Berisha deklaroi se gjatë asaj dite ishte rrethuar në zyrë dhe se ndaj tij ishin hedhur plumba dhe gurë, duke theksuar se gjithçka kishte qenë pjesë e një axhende politike të drejtuar nga Rama. Ai shtoi se gjatë qeverisjes së tij kishte menaxhuar qindra protesta pa incidente dhe se nuk kishte braktisur detyrën apo marrë masa mbrojtëse, ndryshe nga ajo që, sipas tij, ndodh sot.
Sipas Berishës, Rama po përpiqet të përdorë viktimat e 21 janarit për interesa personale dhe politike, duke e cilësuar këtë si “lot krokodili”. Ai tha se kishte dëshmuar në prokurori dhe se protesta e 21 janarit ishte më e dhunshmja në historinë e vendit, e paralajmëruar dhe e organizuar mbi bazën e një falsifikimi dokumentesh.
Berisha theksoi se ka deklarata të qeverisë amerikane dhe institucioneve ndërkombëtare që kërkojnë hetim të plotë të ngjarjes, nga policët e thjeshtë deri te organizatorët kryesorë. Sipas tij, çështja u hetua nga prokuroria e kohës, por pa guximin për të thirrur Ramën, ndërsa sot këto dosje, siç u shpreh ai, janë në shqyrtim jo vetëm në SPAK, por edhe në instancat dhe opinionin publik ndërkombëtar.
