Kreu i Partisë Demokratike, Sali Berisha, është ende i paqartë në lidhje me qëndrimin që duhet të mbaj ndaj SPAK. Në deklaratën e tij jashtë dyerve të Prokurorisë së Posaçme ku u paraqit sot, nga njëra anë, e cilësoi si lajm të mirë qëndrimin e SHBA-së për zgjedhjen e kreut të ri. Ndërsa ana tjetër, Berisha theksoi se nuk beson as tek pasardhësi i tij, pasi sipas tij kushdo që të zgjidhet, do të jetë i përzgjedhur nga kryeministri Edi Rama.
“Altin Dumani po shkulte leshrat, po qante dhe bërtiste sepse u bënë pluhur përpjekjet e tij puçiste, antikushtetuese, për të zgjatur mandatin”, tha Berisha, duke komentuar zhvillimet e fundit.
I pyetur për deklaratën e të ngarkuarës me punë të SHBA në Shqipëri, Nancy VanHorn, e cila vlerësoi punën e Dumanit, Berisha zgjodhi të mos e komentojë drejtpërdrejt, duke thënë se “për të vdekurit ose fol mirë ose mos fol fare – politikisht të vdekur e kam fjalën”.
