Kreu i Partisë Demokratike, Sali Berisha, u paraqit sot në Prokurorinë e Posaçme (SPAK), ku fillimisht shkoi për të zbatuar masën e sigurisë “detyrim paraqitje” të caktuar ndaj tij në kuadër të dosjes “Partizani”. Por, pavarësisht polemikave dhe deklaratave të ditëve të fundit, ish-kryeministri mori sot zyrtarisht fletëthirrjen për t’u paraqitur të premten për çështjen e 21 janarit, ngjarje për të cilën SPAK po heton vrasjen e katër protestuesve në Bulevard.
Dorëzimi i thirrjes në dorën e Berishës i dha fund pretendimeve të tij, të Flamur Nokës dhe Gazment Bardhit se SPAK “nuk kishte dorëzuar asnjë njoftim zyrtar”. Ndërkohë që dokumenti qarkullonte në të gjitha mediat, në selinë e PD-së dhe në adresat zyrtare të formacionit politik askush nuk pranonte ta kishte marrë. Sot kjo dilemë u mbyll: Berisha e mori fletëthirrjen dhe nuk mund t’i shmanget më procedurës.
Para gazetarëve, Berisha përsëriti sërish se nuk ishte thirrur më herët dhe se, sipas tij, organi i posaçëm i kishte shmangur thirrjet për shkak të asaj që ai e quan “frika nga dëshmia”.
“Nuk mund të ketë asnjë lloj ekuivoku. Kjo është një dosje e hetuar gjerësisht nga armiqtë e egër publikë të Sali Berishës. Për këtë temë, sikur të isha thirrë 10 herë, 10 herë do të kisha shkuar. Nuk jam thirrur sepse kanë pasur frikë nga dëshmitë e mia,” u shpreh ai.
Ai deklaroi se nuk kishte marrë asnjë njoftim në asnjë formë:
“Njoftim quhet kur një person të vjen dhe ta dorëzon zyrtarisht. Asnjë nuk më ka thënë orën, datën, apo të më dorëzojë një letër. Kam kontrolluar çdo komunikim: e-mailet, WhatsApp, Signal. Asgjë,” insistoi Berisha.
Megjithatë, sot nuk pati më vend për interpretime. SPAK i komunikoi atij detyrimin për t’u paraqitur të premten për të dëshmuar për rolin e tij si kryeministër në ngjarjet e 21 janarit 2011 – ngjarje për të cilat ai ka refuzuar të paraqitet disa ditë më parë, me arsyetimin se “nuk i ishte dorëzuar thirrja”.
Tashmë, pas marrjes së dokumentit në mënyrë të drejtpërdrejtë, pyetja që nuk i shmanget dot është e vetmja që mbetet pezull:
A do të paraqitet Sali Berisha këtë të premte në SPAK për t’u marrë në pyetje për vrasjen e katër protestuesve?
