Sali Berisha është në një linjë me kryeministrin Edi Rama lidhur me rritjen e pagave të gjyqtarëve, çështje për të cilën pritet që të shprehet Gjykata Kushtetuese.
Pas kryeministrit që kritikoi kërkesën e gjyqtarëve që në orët e para të mëngjesit të sotëm, radhën e pati kreu i PD, Sali Berisha, i cili nuk la pa e komentuar pasi doli nga SPAK, ku u paraqit në zbatim të masës për çështjen “Partizani”.
Kryedemokrati theksoi se rritja e pagave është kompetencë e pushtetit ekzekutiv, por sipas tij, për sa kohë është prishur “piramida” e sistemit, gjykata mund të ndërhyjë.
Por çështja e rrogave të gjyqtarëve, dy aktorët kryesorë politikë duket se e përdorin edhe për të sulmuar institucionet e drejtësisë me të cilat janë në përplasje prej muajsh. Rama për t’i çuar mesazhin e radhës Gjykatës Kushtetuese, ndërsa Berisha për të sulmuar sërish SPAK-un dhe prokurorin Altin Dumani.
“Piramida parashikon rrogën më të lartë kreut të shtetit, piramida ka një shkallë. Nëse ekzekutivi ka firmosur për faqen e zezë të tij, që Altin Troplini të jetë njeriu më i paguar në sistemin e drejtësisë nga kufiri i Sllovenisë e Austrisë e gjer në Qipro, atëherë ai ka bërë jo piramidë të rrogave në përputhje me frymën e Kushtetutës dhe ligjit, por një piramidë me interesat e tij personale. Vërtet ajo është kompetencë e ekzekutivit, por është i detyruar ta ushtrojë në përputhje me parimin”, tha Berisha.
Ngjashmëria e deklaratave të kryeministrit dhe kreut të opozitës lë të kuptohet se qëllimi është për t’i çuar mesazhe drejtësisë dhe jo se i shqetëson një vendim i GJK-së pro rritjes së pagave. Sepse historia politike na ka treguar që kur këta personazhe nuk janë dakord me një vendim të Kushtetueses, nuk e zbatojnë pa iu dridhur qerpiku.
