Kreu i PD, Sali Berisha, ka hedhur akuza ndaj mënyrës se si funksionojnë tregjet në vend, duke deklaruar se oligopolet po dëmtojnë konkurrencën dhe qytetarët, përmes marrëveshjeve të fshehta dhe abuzimit me çmimet, por pa përmendur emra konkretë.
“Oligopoli është një formë e ndërmjetme mes konkurrencës dhe monopolit, por në Shqipëri ai po kthehet në një veprimtari antiqytetare”, tha Berisha nga mbledhja e grupit parlamentar të PD-së.
Kryedemokrati përmendi si shembuj tregun e hidrokarbureve, mishit dhe sheqerit, dhe akuzoi drejtpërdrejt qeverinë për favorizim të oligopoleve, ndërsa qytetarët përballen me çmime të larta dhe mungesë mbrojtjeje.
Megjithatë, në të gjithë denoncimin e tij, Berisha nuk përmendi asnjë emër të kompanive që, sipas tij, favorizohen nga qeveria. Kjo nuk është hera e parë që kreu i PD përdor këtë mënyrë denoncimi, e cila flet për problemin, por pa emra konkretë përgjegjësish. Madje për këtë akuzonte më parë “ish-vartësin” e tij Lulzim Basha, kur bënte denoncimet.
Kjo praktikë zakonisht ndodh kur je i detyruar të shfaqesh si opozitar për të denoncuar padrejtësitë e shtetit, por ke hallin se në atë çështje janë edhe miq biznesmenë që nuk u duhet prishur imazhi. A është vallë e njëjta situatë me Berishën, apo kryedemokrati po denoncon pa u informuar mirë?
