Kryetari i Partisë Demokratike, Sali Berisha, mbrojti gjyqtaren Sonila Bejtja në konferencën për mediat të sotme, duke sulmuar vendimin e djeshëm të Gjykatës Kushtetuese për ndërprerjen e mandatit të saj. Berisha u shpreh se me këtë veprim, Kushtetuesja ka shkelur ligjin.
Kreu i PD-së nuk kurseu as kryetarin e Gjykatës së Lartë, Sokol Sadushi. Ky i fundit në bazë të ligjit ka insistuar për përfundimin e mandatit të Bejtjas, ndërsa Berisha e cilësoi si eksponent kryesor i mafies në drejtësinë shqiptare.
“Gjykata Kushtetuese vendosi shkeljen e ligjit të saj. Ajo u bë notere e një serie veprimesh antikushtetuese dhe antiligjore të eksponentit më kryesor të mafies në drejtësinë shqiptare, me emrin Sokol Sadushi, dhe të presidentit antikushtetues. Sonila Bejtja, gjyqtare e emëruar në vitin 2020 me dekret të presidentit Meta, është objekt i vendimit të Kushtetueses për ndërprerjen e mandatit të saj. Përmbajtja e nenit 125, pika 6 e Kushtetutës, përcakton se përbërja e Gjykatës Kushtetuese përtërihet çdo tre vjet me një të tretën e saj,” tha Berisha.
Madje, kryedemokrati nuk u shqetësua për dy standardet që mban publikisht kur preken “marionetat” e tij në gjykatën më të lartë në vend. Hipokrizia qëndron në faktin se vetëm pak ditë më parë, kur Gjykata Kushtetuese rrëzoi dekretin e Begajt për zgjedhjet në Bashkinë e Tiranës, Berisha doli në një deklaratë për mediat dhe shpalli këtë institucion si mbrojtës të rendit kushtetues.
“Mbrojtën Kushtetutën nga armiqtë e saj, nga horrat e shtetit. I vunë vulën e turpit Edi Ramës, presidentit të tij kukull, dhe të gjithë atyre që u përfshinë në këtë akt antikushtetues,” deklaroi Berisha.
