Kryetari i Partisë Demokratike, Sali Berisha, zhvilloi sot një konferencë për mediat nga selia blu, ku shprehu solidaritetin e tij dhe të PD-së me gazetarët dhe punonjësit e Focus Media Group, pronare e televizionit News24.
Berisha akuzoi kryeministrin Edi Rama për “agresion banditesk” ndaj fjalës së lirë, duke theksuar se ndërprerja e sinjalit dhe shkëputja e kabllove të transmetimit të televizionit gjatë tre ditëve të fundit janë kryer pa asnjë bazë ligjore.
Sipas tij, News24 është televizioni i tretë që bëhet “viktimë e Ramës”, pas dy mediave të tjera që kanë pësuar presion të ngjashëm.
“News24 dhe Focus Media Group ishin ndër të paktat media shqiptare që ruanin pavarësinë në lajme, debate dhe investigime. Ky ekip tronditi Edi Ramën me emisionet e tij, prandaj u godit,” u shpreh Berisha, duke shtuar se kontratat e qirasë së godinës janë të vlefshme deri në vitin 2033 dhe pagesat janë kryer rregullisht. Ai e cilësoi situatën si “atentat të rëndë ndaj fjalës së lirë” dhe kërkoi rikthimin e menjëhershëm të transmetimit dhe veprimtarisë së mediave të grupit.
Në të njëjtën konferencë, Berisha njoftoi se Partia Demokratike do të ngrejë një komision hetimor parlamentar për të zbardhur atë që e quajti “veprimtaria kriminale Rama–McGonigal” në Shqipëri, me hetime që do të shtrihen edhe në Kosovë.
“Opozita do të sjellë prova dhe fakte për të demaskuar mbrojtjen që Altin Troplini i ka bërë McGonigalit, një nga protagonistët kryesorë në mashtrimin e madh të dosjes ruse që përfshiu edhe presidentin Donald Trump në mandatin e tij të parë,” tha Berisha.
Sipas tij, komisioni do të ketë si qëllim evidentimin e të gjitha lidhjeve dhe përgjegjësive në këtë skandal, duke u fokusuar tek përfshirja e aktorëve politikë dhe institucionale në Shqipëri dhe rajon.
