Kryetari i Partisë Demokratike, Sali Berisha, ka akuzuar qeverinë për përgjegjësi direkte në përmbytjet e rënda që përfshinë Durrësin dhe disa qarqe të tjera të vendit. Në një deklaratë për mediat, para mbledhjes me Grupin Parlamentar, Berisha tha se patronazhistët kishin vjedhur pompat e hidrovorit të Hamallës.
“Shqiptarët e nisën këtë vit në shumë zona të vendit, nga Gjirokastra në Shkodër, por veçanërisht në Durrës dhe qarkun e Durrësit, me një përmbytje të përmasave të papara ndonjëherë. Në një përmbytje ku shteti jo vetëm nuk ishte mbështetje për qytetarët, por korrupsioni i tij i çmendur dhe i papërmbajtur ishte shkaku kryesor i kësaj katastrofe. Në Durrës, dy hidrovorë të fuqishëm dhe dy kanalet kryesore mbrojtëse ishin jashtë funksionit. Në hidrovorin e Hamallës, patronazhistët kishin vjedhur tre pompa të fuqishme, të zhdukura të gjitha”, tha ai.
Berisha shtoi se në ujërat që përmbytën mijëra shtëpi “u përmbyt edhe morali i kalbur i kësaj qeverie”, ndërsa qeveria vazhdonte ahengjet dhe udhëtimet e saj.
Kryedemokrati vijoi akuzat për korrupsion ndaj qeverisë Rama, duke deklaruar se “të gjithë shqiptarët, si brenda vendit, ashtu edhe miqtë e Shqipërisë në Europë dhe në botë, presin nga PD dhe nga opozita shqiptare zgjidhjen e situatës dramatike në Shqipëri”.
“Zgjidhjen përfundimtare të kësaj situate, e cila në asnjë vend tjetër, një vend anëtar i NATO-s dhe që pretendon të ecë drejt BE-së, faktohet para qytetarëve dhe mbarë botës, e ka penguar një klikë e papërgjegjshme, një organizatë kriminale që vjedh qytetarët ditë e natë”, tha Berisha.
Ai gjithashtu bëri thirrje qytetarëve t’i bashkohen protestës kombëtare që do të mbahet më 24 janar para Kryeministrisë.
