Kreu i PD Sali Berisha, ka akuzuar kryeministrin Rama, se ai synon të “privatizojë” tenderat e AKSHI-t në favor të baxhanakut të tij.
Në fjalën e tij, Berisha e cilësoi nismën si një “goditje fatale ndaj shtetit ligjor” dhe akuzoi mazhorancën se po krijon një “mburojë” për kryeministrin.
“Edhe pushtuesi më i egër do të përpiqej ta maskonte një veprimtari të tillë armiqësore dhe poshtëruese ndaj qytetarëve. Kjo që bëni është krim i madh ndaj Kushtetutës dhe shtetit ligjor”, u shpreh Berisha.
Ai shtoi se Kushtetuta parashikon në disa raste pezullimin nga detyra, ndërsa sipas tij, mazhoranca po përpiqet ta pengojë këtë përmes ndryshimeve proceduriale. Berisha e quajti draftin e propozuar “ligji i Lindës së Surrelit dhe i AKSHI-t”, duke pretenduar se përmes tij synohet që tenderat e këtij institucioni të kalojnë në mënyrë të favorizuar.
"Këta që keni futur ju pezullohen me kushtetutë, dhe ju me procedurë kërkoni të pengoni pezullimin. Sot keni prurë ligjin e Lindave. Ai është ligji i Lindës së Surrelit e AKSH-t. Duan ta marrë privatisht baxhanaku tenderat, ato që i merrte me pengmarrje, do t’i marrë me ligj tenderat e AKSHI-t.”, tha Berisha.
