Kreu i Partisë Demokratike, Sali Berisha, hodhi sot akuza të rënda në lidhje me zhvillimet e fundit, duke deklaruar se Ergys Agasi ka rreth tre javë që ka lënë Shqipërinë dhe se largimi i tij, sipas Berishës, është bërë me dijeninë e njërit prej tre personave: Vlora Hysenit, kryeministrit Edi Rama ose kreut të SPAK, Altin Dumani.
“Nuk mund të vë dorën në zjarr se cili prej tyre,” tha Berisha, duke shtuar se këta kanë qenë njerëzit më të afërt dhe më konfidentë të Agasit.
Sipas kreut të PD-së, Ergys Agasi ka pasur një rol kyç në koordinimin e bashkëpunimit mes figurave të botës së krimit. Berisha e akuzoi atë se ka lidhur dhe koordinuar bashkëpunimin mes Suel Çelës, Elvis Doçit, Xhevdet Troplinit dhe grupeve të tjera kriminale.
“Histori si kjo nuk do t’i gjeni as në romane, as në filma,” deklaroi Berisha.
Në vijim të deklaratës së tij, Berisha pretendoi se nga Shqipëria është larguar edhe Ermal Beqiri, të cilin e cilësoi si “koka tjetër e mafies”.
Berisha foli gjithashtu për raste pengmarrjeje, duke thënë se Gerond Meçe nuk ka qenë i vetmi biznesmen i marrë peng. Sipas tij, për rreth tre muaj është mbajtur peng edhe Daniel Shima.
Kreu i PD-së deklaroi se Daniel Shima fillimisht ka qenë shofer dhe më pas është emëruar në poste gjithnjë e më të larta, deri në pozicionin e zëvendësdrejtorit të Agjencisë Kombëtare të Shoqërisë së Informacionit.
“Nga shofer e bëri mbishofer, nga mbishofer zëvendësdrejtor të AKSHI-t. Imagjinoni ju tani,” u shpreh Berisha, duke i cilësuar këto zhvillime si histori “nga më të papërshkrueshmet”.
