Gjykata Kushtetuese ka vendosur pezullimin e ekzekutimit të vendimeve të Gjykatës së Posaçme të Shkallës së Parë (nr. 118 dhe 120) që kishin vendosur masën ndaluese “pezullimi nga detyra” për Belinda Ballukun. Si rezultat, Balluku rikthehet në detyrën e zv/kryeministres dhe ministres së Infrastrukturës dhe Energjisë deri më 22 janar.
Vendimi u mor me shumicë votash: pro ishin gjyqtarët Sonila Bejtja, Fiona Papajorgji, Genti Ibrahimi, Sandër Beci dhe Marjana Semini, ndërsa tre gjyqtarë votuan kundër: Marsida Xhaferllari, Ilir Toska dhe Asim Vokshi.
Shumica argumentoi se pezullimi i Ballukut do të krijonte pasoja ndaj funksionimit të pushtetit ekzekutiv dhe interesave shtetërore, ndërsa pakica vlerësoi se nuk kishte urgjencë të nevojshme dhe vendimi ndërhynte në procesin gjyqësor.
