Belind Këlliçi ka zbuluar për herë të parë një nga strategjitë që opozita parashikon për të goditur atë që Partia Demokratike e quan “makinerinë elektorale të patronazhistëve”.
Ai bëri të ditur se do të ngrihet një portal ku do të publikohen me emër e mbiemër patronazhistët, të cilët sipas tij mbajnë vende pune në administratë pa shkuar asnjëherë, pasi misioni i tyre është të mbledhin nga 20 vota në ditën e zgjedhjeve.
“Do të nxjerrim emrat e të gjithëve. Do të bëjmë një portal për një mur turpi për patronazhistët. Nuk ka administrator që nuk është kthyer në patronazhist. Do nxjerrim një mur turpi për spiunët dylekësha që thonë me kë e pi kafen ky, kë takon ky. Do të duhet të goditet demaskimi publik i çdo identiteti të këtyre njerëzve që shkojnë në punë për të garantuar 20 vota për PS ditën e zgjedhjeve”, deklaroi Këlliçi.
Ai shtoi se sistemi mbështetet nga Edi Rama: “Nuk ka diferencë mes gomarit, Erion Veliajt dhe Manastirliu, pasi sistemin e garanton Edi Rama. Është ai që ushqen makinerinë e vjedhjes së votave, parave publike për të vjedhur vota, me tenderë, koncesione.”
