Delegacioni i Bashkimit Europian në Shqipëri ka reaguar pas protestës së djeshme të Partisë Demokratike, duke theksuar se e drejta për tubim paqësor është një shtyllë themelore e çdo shoqërie demokratike, por duhet të ushtrohet me përgjegjësi dhe në respekt të plotë të sundimit të ligjit.
Në deklaratën zyrtare, Delegacioni i BE-së shpreh shqetësim për aktet e fundit të dhunës në Tiranë, të cilat, sipas tij, rrezikuan jetët e qytetarëve.
“Delegacioni i Bashkimit Evropian thekson se e drejta për tubim paqësor është një shtyllë themelore e çdo shoqërie demokratike. Ajo duhet të ushtrohet me përgjegjësi, në respekt të plotë të sundimit të ligjit dhe të sigurisë së të gjithë individëve. Në këtë kontekst, Delegacioni i BE-së shpreh shqetësim për aktet e fundit të dhunës në Tiranë, të cilat rrezikuan jetë njerëzish”, thuhet në reagim.
Delegacioni i BE-së u bën thirrje aktorëve politikë të tregojnë vetëpërmbajtje dhe thekson mbështetjen për një angazhim konstruktiv në funksion të reformave të rëndësishme në rrugën e Shqipërisë drejt Bashkimit Evropian.
