Bashkimi Evropian ka reaguar zyrtarisht ndaj deklaratave të bëra nga kreu i Partisë Demokratike, Sali Berisha, ndaj ambasadorit të BE-së në Tiranë, Silvio Gonzato, duke i cilësuar ato si të papranueshme.
Në një reagim për Euronews Albania, një zëdhënës i Komisionit Evropian deklaroi se Bashkimi Evropian dënon me forcë sulmet personale të bëra ndaj ambasadorit Gonzato në Ditën e Europës.
“Deklarata të tilla janë të papranueshme. BE-ja dënon me forcë sulmet personale të bëra në Ditën e Evropës ndaj Ambasadorit të Bashkimit Evropian në Shqipëri”, thuhet në reagim.
Sipas deklaratës, ambasadori Gonzato ka ushtruar detyrën e tij me profesionalizëm dhe integritet të plotë.
“Ambasadori i BE-së ka vepruar në çdo kohë me profesionalizëm dhe integritet të plotë. Ne kemi besim të plotë tek ai dhe puna e tij”, theksoi zëdhënësi i Komisionit Evropian.
Reagimi vjen në një moment tensionesh politike dhe pas deklaratave publike të Berishës ndaj përfaqësuesit të Bashkimit Evropian në Tiranë, të cilat kanë sjellë edhe reagime të tjera diplomatike në mbështetje të ambasadorit Gonzato.
