Kryeministri Edi Rama ka komentuar sërish çështjen e bashkimit kombëtar mes Shqipërisë dhe Kosovës, duke e cilësuar atë si një “formulë të shekullit të 19 dhe 20”, e cila sipas tij nuk reflekton realitetin e sotëm politik dhe ndërkombëtar.
Në një intervistë të fundit, Rama u shpreh se përparimi në këtë drejtim është i pamundur pa ndërtuar besim dhe simpati të plotë ndërkombëtare, gjë që sipas tij aktualisht mungon.
“Është e pamundur të përparohet në asnjë drejtim pa krijuar miqësi dhe aleanca të forta ndërkombëtare. Kjo nuk arrihet vetëm sepse ne e dëshirojmë, por sepse duhet të kemi mbështetjen e duhur. Në këtë aspekt, fjala më e butë që mund të thuhet është se nuk ka asnjë progres nga ana e Kosovës në forcimin e marrëdhënieve ndërkombëtare”, deklaroi Rama.
Ai theksoi se e vetmja rrugë reale për bashkim është integrimi i përbashkët në Bashkimin Evropian, duke nënvizuar:
“Për mua, nëse flasim për bashkim kombëtar, flasim për Bashkim Evropian.”
"Jetojmë në shekullin 21 dhe nuk mund të mendojmë në shekullin 21 me formula të shekullit 20 dhe lëre pastaj të shekullit 19 apo më përpara. Për mua, nëse flasim për bashkim kombëtar, flasim për Bashkim Evropian. Nëse flasim për bashkim kombëtar jashtë Bashkimit Evropian, jemi duke folur me vete dhe për vete por as për vete jo sepse është tërësisht një fantazi që s’ka lidhje me realitetin”, tha Rama.
