Pesë anëtarët e opozitës në Këshillin e Mandateve dhe Imuniteteve kanë tentuar të zhvillojnë sot në orën 11:00 mbledhjen e këtij këshilli, por një gjë e tillë ka qenë e pamundur, pasi dera e sallës ku duhej të mbahej mbledhja ishte e mbyllur me çelës.
Deputetët e opozitës Oerd Bylykbashi, Elda Hoti dhe Saimir Korreshi janë paraqitur në ambientet e Kuvendit, por kanë konstatuar se salla ishte e bllokuar, duke u penguar kështu ushtrimi i përgjegjësive të tyre kushtetuese.
Kreu i Grupit Parlamentar të PD-së, Gazment Bardhi, në një prononcim për mediat, deklaroi se Kuvendi është shndërruar në një “bunker” për të mbrojtur korrupsionin e zëvendëskryeministres Belinda Balluku. Ai theksoi se kanë kaluar 10 ditë nga kërkesa e SPAK për heqjen e imunitetit të saj, çka sipas tij hap rrugën për arrestimin.
“Gjysma e Këshillit kërkoi mbledhjen e Këshillit të Mandateve dhe Imuniteteve. Sot mbushen 10 ditë nga kërkesa e SPAK për heqjen e imunitetit të Ballukut, e cila akuzohet për shkelje në 11 procedura tenderimi me vlerë 1.1 miliardë euro. Në një akt të turpshëm dhe pa precedent nga Niko Peleshi, jo vetëm që u mbyllën sallat e mbledhjeve, por u penguan edhe deputetët të komunikonin me mediat. Kuvendi është kthyer në bunkerin e Belinda Ballukut”, u shpreh Bardhi.
Sipas tij, mazhoranca po tenton të marrë peng drejtësinë dhe të pengojë SPAK-un të bëjë detyrën. “Peleshi, njësoj si Rama, e ka kthyer zyrën e tij në zyrë avokatie të Belindës”, tha Bardhi.
Nga ana e tij, deputeti Oerd Bylykbashi e cilësoi situatën si skandal dhe akuzoi drejtpërdrejt kryetarin e Kuvendit, Niko Peleshi, se ka urdhëruar mbylljen e sallës së mbledhjes së Këshillit të Mandateve, duke bllokuar qëllimisht procesin parlamentar.
