E kuruar, me grim dhe me buzëqeshje, Belinda Balluku doli në deklaratë për aksionin e lirimit të hapësirave publike, duke thënë se tani është radha e fadromave të IKMT-së të hyjnë në aksion.
Siç kishte paralajmëruar edhe kryeministri Rama, dje ishte afati i fundit për largimin vullnetar nga hapësirat pranë akseve kombëtare.
Balluku njoftoi se nga tani IKMT-ja, me mbështetjen e Policisë, do të marrë masa konkrete për respektimin e distancave të ligjshme.
Në një gjuhë që nuk lejon keqkuptime, ajo theksoi se nuk bëhet fjalë për një aksion kundër tendave, por për një “reformë të thellë” që përfshin gjithçka: tendat, oborret e pallateve të zaptuara dhe TEC-et e ndërtuara në mënyrë të paligjshme, të cilat sipas saj, ekzistojnë pavarësisht mohimeve “qesharake” dhe mbrojtjes së tyre nga “segmentet e paguara për të goditur të mirën publike”.
Qetësia e Ballukut në të vërtetë është furtunë për qindra mijëra qytetarë të cilëve do t’u prishen bizneset apo shtëpitë. Dhe këtë jo vetëm për shkeljen e ligjit që kanë bërë, por edhe për gjumin e drejtuesve të shtetit, të cilët në vend që t’i parandalonin pa filluar, i lanë të lirë të investonin djersën e tyre.
Është e lehtë për Ballukun dhe shefin e saj të kujtohen kur të duan të lëshojnë urdhra për të treguar forcën e ligjit, por më e drejtë do të ishte që ligjin ta zbatojnë çdo ditë dhe jo çdo vit që sigurojnë një mandat tjetër pushteti.
